Gwasanaeth Gwaed Cymru'n penodi Cyfarwyddwr Meddygol Newydd

Bydd Dr Edwin Massey yn cychwyn yn ei swydd newydd fel Cyfarwyddwr Meddygol Gwasanaeth Gwaed Cymru ym mis Ebrill 2023, gan gymryd lle Dr Janet Birchall, sydd wedi ymddeol.

Mae gan Edwin dros 20 mlynedd o brofiad ym maes trallwyso gwaed, gan gynnwys rolau blaenorol yn gweithio i NHSBT (Gwaed a Thrawsblaniadau’r GIG) ac i Ysbytai Prifysgol Bryste a Weston.

Cyn ymuno â Gwasanaeth Gwaed Cymru yn 2021 fel Haematolegydd Ymgynghorol, bu Edwin yn gweithio fel Swyddog Cyfrifol ac fel Cyfarwyddwr Meddygol Cyswllt ar gyfer Gwasanaethau Diagnostig a Therapiwtig i NHSBT.

Ar ôl dychwelyd i'r maes yma'n ddiweddar, rwyf wedi mwynhau fy hun yn fawr, diolch i ymrwymiad a chefnogaeth fy nghydweithwyr. Rwy'n edrych ymlaen at heriau cyffrous y rôl hon," meddai Edwin.

Edwin yw Cadeirydd Tasglu Trallwyso Haematoleg Prydain, ac mae’n Gadeirydd y Pwyllgor Cynghori Sefydlog ar gyfer Imiwnhaematoleg (SAC-IH) ar gyfer Gwasanaethau Trallwyso Gwaed a Thrawsblannu Meinwe y DU hefyd.

Fel rhan o'i rôl newydd fel Cyfarwyddwr Meddygol GGC, bydd Edwin yn gweithio fel Cyfarwyddwr Meddygol Cynorthwyol Ymddiriedolaeth GIG Prifysgol Felindre hefyd. Yn y rôl hon, bydd Edwin yn cydlynu'r gwaith o weithredu’r Cynllun Iechyd Gwaed sydd wedi'i ddiweddaru'n ddiweddar ar draws GIG Cymru.

Mae'r cynllun yn gosod y cyfeiriad ar gyfer arferion trallwyso, i sicrhau bod y ffocws, drwy GIG Cymru, ar ateb anghenion cleifion a chefnogi rhoddwyr, er mwyn iddynt allu rhoi gwaed yn ddiogel i gyflawni hyn. Mae Edwin a'i dîm yn gyfrifol am arwain diogelwch ac ansawdd gwasanaethau hefyd, gan gynnwys ymchwil, datblygu ac arloesi.

Wrth drafod penodiad Edwin, meddai Alan Prosser, Cyfarwyddwr Gwasanaeth Gwaed Cymru: "Rwy'n falch dros ben bod Edwin wedi cael ei benodi i rôl Cyfarwyddwr Meddygol Gwasanaeth Gwaed Cymru. Bydd ei arbenigedd a'i brofiad yn y meysydd trallwyso a haematoleg yn hanfodol wrth lunio ein hamgylchedd clinigol fel Gwasanaeth, ac nid oes gennyf unrhyw amheuaeth y bydd yn adeiladu ar lwyddiannau a chyflawniadau ei ragflaenydd, Dr Janet Birchall.